اللايف كوتشينج.. سبوبة ؟؟ بقلم ا- غادة حامد
اللايف كوتشينج.. سبوبة
اللايف كوتشينج.. سبوبة
– الواحد بصراحة لازم يهتم بنفسه شوية .. و الله باجي عليها جامد عشان اللي حواليا ينبسطوا ..
– انتي عايشة كدة ازاي؟
– عايشة في الدوامة بعيد عنك .. متكتفه جدا بالمسؤولية والالتزامات حتى التفكير في الترفيه البسيط…غير متااااح….. والسبب التزامي الداخلي أنا مسيطره على انا…….
– طيب جربتي تروحي اللايف كوتش بساعدك ؟
– ليه هو انتي شايفاني مجنونة.. انا بس بافضفض معاكي .. دة انا زي الفل
يا ختي كله نصب.. انا هاعتبرك انتي اللايف كوتش مش سمعتيني زي ما بيعملوا؟ خلاص فل اوي كدة
-بس هما ليهم طريقة معينة في المناقشة عشان تفهمي نفسك و مشاكلك و تعيشي بشكل افضل
– قصدك اني مش فاهمة نفسي؟ و التبي ياختي كله أي كلام و شغلانة اللي مالوش شغلة اهو سبوبة
– بس تعرفي ان انا جربته قبل كدة؟
– بجد؟ امتي؟ بس انا شايفاكي كويسة !
– واحدة واحدة .. اللايف كوتش أولا مش بيشتغل مع مرضي خالص هو بيشتغل مع الناس العاديين اللي بيكونوا عايزين يتخلصوا من أعباء ضاغطة عليهم نفسيا و موتراهم ، او ذكريات مضايقاهم ، او عايزين يطوروا من نفسهم مثلا في التعاملات ، في الثقة في النفس،، بس مش عارفين ، عايزين يتخطوا بلوك نفسي ، و مش عارفين..
– طيب وانتي رحتي للايف كوتش ليه؟
– عشان كنت زي ما بتقولي كدة بالظبط مش مقدرة نفسي كويس و مش فاهماها و مفضلة عليها أي حاجة تانية واتضح ان هو دة السبب اللي موترني و مخليني حاسة اني مليانة و مضغوطة و مش عارفه ليه
– طب و عمل لك ايه ؟
– أولا خلاني اعرف اني عدم اهتمامي بنفسي هو لاني في الأصل شايفة اني (مش مهمة) و ان أي حاجة حواليا اهم مني .. يعني اودي صاحبتي للدكتور اهم من اني اروح انا نفسي للدكتور، اما اكل بواقي اكل الأولاد دة لاني شايفه اني مش مهمة اوي .. و طول ما انا مش مهمة في اللاواعي بتاعي باتصرف علي الأساس دة و باضطر
احمل نفسي فوق طاقتها، لان كل الناس التانية في نظري اهم و احتياجاتهم اهم و لهم أولوية
– اللايف كوتش قال لك كدة؟
– لا .. اما قعدت احكي و اطلع اللي جوايا مع اللايف كوتش ، بتعليقاته و اسئلته المحنكة علي كلامي خلاني اكتشف كدة في نفسي و بنفسي
– طيب و اداكي دوا بقي و لا عملتي ايه ؟
– ببساطه خلاني اكتب الحاجات اللي باحبها و اعمل كل يوم حاجة منها لمدة ١٠ دقايق و احس بالفرق جوايا و في يومي و اكتبه
– وكدة بقي اتعالجتي ؟
– يا بنتي انا مش مريضة و اللايف كوتش مش دكتور.. هو بيساعدك تحطي ايدك علي الحاجة اللي مسببة لك الازمة او التوتر و بيسلط الضوء علي الحلول و يسيبك انتي تختاري لنفسك اللي يناسبك ..
– يعني مش نامي علي الشيزلونج و افتكري طفولتك؟
– لا
– و لا ادوية
– لا
– و لا فضفضة و كلمتين نصب ؟
– لا دة علم حديث بيساعدك تعيشي حياة افضل من خلال فهم مشاعرك و افكارك و المثيرات و الحاجات اللي جواكي و بالتالي تعرفي ليه انتي مضغوطة و ايه اللي ممكن تعمليه عشان تعيشي بسلام
– ممكن رقم اللايف كوتش؟
